اسلام آباد ( سٹاف رپورٹر ) قومی ایئرلائنز کی فروخت کے لئے بولی کا عمل مطلوبہ نتائج نہ دے سکا جس کے بعد بولی کا عمل روک دیا گیا ہے ۔ نجکاری کمیشن بورڈ نے پی آئی اے کی نجکاری کیلیے موصول ہونے والی بولی مسترد کردی۔ وفاقی وزیرنجکاری عبدالعلیم خان کی زیرصدارت پرائیوٹائزیشن کمیشن بورڈ کا اجلاس ہوا، جس میں بورڈ نے پی آئی اے کے 60 فیصد حصص کیلیے بلیو ورلڈ سٹی کنسورشیم کی 10ارب روپے بولی مسترد کرنے کی سفارش کی۔ اس موقع پر وفاقی وزیر نے کہا کہ نجکاری کے امور قواعد و ضوابط اور ملکی مفاد کو سامنے رکھتے ہوئے طے ہوں گے، پی آئی اے و دیگر اداروں کی نجکاری کا حتمی فیصلہ کابینہ کمیٹی نے کرنا ہے۔ آئندہ پیشکش کا عمل بہتر اور بلاتاخیر آگے بڑھایا جائے، ہم حلف کے پابند ہیں، ملک و قوم کی بہتری کیلیے جو کچھ ہوا،ضرور کریں گے۔
