واشنگٹن ڈی سی (مانیٹرنگ ڈیسک ) پاکستان میں صوبائی وزرا اور مشیروں کی تنخواہوں میں 900فیصد اضافے پر امریکا کاردعمل سامنے آگیا ہے۔امریکی وزارت خارجہ کے ترجمان کی پریس بریفنگ میں ایک صحافی نے پوچھا کہ پاکستان میں وزراء کی تنخواہوں میں بھاری اضافہ ہوا ہے۔ صحافی نے کہا کہ واشنگٹن ڈی سی میں پاکستانی وزیر خزانہ سے پوچھا تھا کہ ایک ایسے ملک میں یہ اضافہ بالکل ناقابل قبول ہے جہاں اتنی غربت ہو اور پھر آپ یہاں فنڈز یا قرضے مانگنے آتے ہیں یہی سوال آپ سے ہے ۔ جس پر امریکی وزارت خارجہ کے ترجمان میتھیو ملر نے کہا کہ میرے خیال میں تنخواہوں میں اضافے کا سوال پاکستان کے عوام اور وہاں حکومت کا اپنا معاملہ ہے۔ یہ امریکا کامسئلہ نہیں ہے ۔
انہوں نے مزید کہا کہ اس لیے سوال بھی پاکستانی حکومت سے ہونا چاہیے۔ امریکا سے نہیں۔ ملر نے کہا کہ ہم دنیا بھر میں کسی بھی ملک کے حکومتی ملازمین کی تنخواہوں پر اپنی رائے نہیں دیتے اور ہماری یہ پالیسی پاکستان کے لیے بھی ہوگی۔
